Notice

  "From the Karen National Political Dialogue to ward the Political Will of the Karen National"  

  "From the Karen National Political Dialogue to establish a Federal Democratic Union"  

  • English
  • Karen
  • Myanmar

News

News

သုးက့ (၃) ဟီၣ်ကဝီၤပူၤ ၂၀၂၂ နံၣ် လါအီကူးဒီတလါ အကတီၢ်ပူၤ သုးမီၤစိရိၤအသုး တၢ်မၤထီဒါ ဟီၣ်ခိၣ်ဖိခွဲးယၥ် ဒီး တၢ်ဒုးကစီၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ ၂၀၂၂ နံၣ် လါအီကူးဒီတလါ အကတီၢ်ပူၤ သုးမီၤစိရိၤအသုး တၢ်မၤထီဒါ ဟီၣ်ခိၣ်ဖိခွဲးယၥ် ဒီး တၢ်ဒုးကစီၣ်
၂၀၂၂ နံၣ်, လါစဲးပထ့ဘၢၣ် (၁၀) သီ ခ့ၣ်အဲၣ်ယူၣ်-လီၢ်ခၢၣ်သး

၂၀၂၂ နံၣ် လါအီကူးထီၣ် (၁) သီအနံၤ လၢၢ်ဒိၣ်ကီၢ်ဆၣ် ဟီၣ်ကဝီၤပူၤ ဖဲဂီၤ (၇း၃၀) အဆၢကတီၢ် သုးမီၤစိရိၤအသုးသ့ၣ်တဖၣ် ဖီၣ်ဝဲကမျၢၢ်ဖိ လၢအတၢ်ကမၣ်တအိၣ်ဘၣ် ခဲလၢၥ် (၈) ဂၤဒီး သံကွၢ်သံဒိးဝဲ တဲပျံၤတဲဖုးဝဲ၀ံၤ ဖဲဟါ (၆) နၣ်ရံၣ်အဆၢကတီၢ် ပျၢ်ကွံၥ်ဝဲကမျၢၢ်ဖိလၢ ဖီၣ်ဃၥ်ဝဲသ့ၣ်တဖၣ်န့ၣ်လီၤ. ဖဲမုၢ်နၤခီ (၁၁) နၣ်ရံၣ်အဆၢကတီၢ် သုးမီၤစိရိၤအသုးတဖၣ် ခးလီၤဝဲကျိဖးဒိၣ် လၢလၢၢ်ဒိၣ်ဝ့ၢ် (ပဲခူးရပ်ကွက်) အဃိ ဘၣ်ဒိဝဲသဝီဖိ (၂) ဂၤန့ၣ်လီၤ.
ဆီထံးကီၢ်ဆၣ်ဟီၣ်ကဝီၤ ကစၢၢ်ဒီၣ်ဃီတၢ်လီၢ် ဖဲ ၂၀၂၂ နံၣ် လါအီကူးထီၣ် (၁) သီအနံၤ သုးမီၤစိရိၤအသုးသ့ၣ်တဖၣ် ဟဲခးလီၤတၢ်လၢ ကဘီယူၤ ၃ ဘျီ ဒီး တဘျီအတီၢ်ပူၤ ခးဝဲယံၥ် (၁) နၣ်ရံၣ်ဃၣ်ဃၣ်န့ၣ်လီၤ. ကမျၢၢ်ဖိသ့ၣ်တဖၣ် ဘၣ်ပျံၤဘၣ်ဖုးတၢ် ဒီး ဃ့ၢ်အိၣ်ခူသူၣ်လၢ ပှၢ်လၥ်ကျါန့ၣ်လီၤ.

၂၀၂၂ နံၣ် လါအီကူးထီၣ် (၂) သီအနံၤ မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုး ခမရ (၆၀၃) အသုးတဖၣ် အိၣ်ဟဲထီၣ်လၢ ကၠိပ့ၣ်စ့း ဒီး နုၥ်လီၤဝဲဆူ ဟီၣ်ထးပျီသဝီပူၤန့ၣ်လီၤ. ဖဲဂီၤ (၈း၀၀) အဆၢကတီၢ် ဖီၣ်ဝဲ ၀ၣ်ဃးသဝီဖိ (၂) ဂၤ ဒီး သမံသမိးဝဲ မၤပျံၤမၤဖုးဝဲ၀ံၤ ဒီး ဖဲဟါခီ (၄း၀၀) အဆၢကတီၢ် ပျၢ်ကွံၥ်ဝဲဒၣ်န့ၣ်လီၤ. ဖဲဂီၤခီ (၁၀း၃၀) အဆၢကတီၢ် သုးမီၤစိရိၤအသုး အိၣ်ဖဲ (ငလီးတဲး ဒီး သထ့ကိ) တဖၣ် ခးလီၤဝဲကျိဖးဒိၣ်ဆူ ပနၢ်၀ၥ်ပျီသဝီ ကပိၥ်ကပၤ ခဲလၢၥ် (၁၁) ဖျၢၣ်န့ၣ်လီၤ.
၂၀၂၂ နံၣ် လါအီကူးထီၣ် (၃) သီအနံၤ မူကီၢ်ဆၣ်ဟီၣ်ကဝီၤပူၤ ဖဲဂီၤခီ (၉း၀၀) အဆၢကတီၢ် သုးမီၤစိရိၤအသုး ကဘီယူၤဟဲဆှၣ်တၢ်လၢ (မိၣ်ည့ဒၢ, ထံဃိၣ်နွါလ့ခိၣ်) တၢ်လီၢ်သ့ၣ်တဖၣ် အဃိ ကမျၢၢ်ဖိသ့ၣ်တဖၣ် ဘၣ်ပျံၤဘၣ်ဖုးတၢ် ဒီး ဘၣ်အိၣ်လၢတၢ်ပလီၢ်ပဒီအပူၤန့ၣ်လီၤ.
၂၀၂၂ နံၣ် လါအီကူးထီၣ် (၄) သီအနံၤ မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုးရ့ၣ် ခမရ-၅၉၀ အသုးတဖၣ် ဖီၣ်ဝဲ မူဝ့ၢ်ကဝီၤ (၃) သဝီဖိခဲလၢၥ် (၂၅) ဂၤ ဖဲအဝဲသ့ၣ်တဖၣ် ထီၣ်သဲးသၣ်အဆၢကတီၢ်န့ၣ်လီၤ. သဝီဖိလၢ ဘၣ်တၢ်ဖီၣ်အီၤ (၂၅) ဂၤအံၤက့ၤကိးဝဲဆူ ခမရ-၅၉၀ အသုးကလၢၤပူၤ ဒီး ဃ့အီၣ်ဝဲ စ့ပယီၤ အကလီၢ်တကယၤယဲၢ်ဆံ န့ၣ်လီၤ. ဖီၣ်ဒုးဃၥ်ဝဲ ကမျၢၢ်ဖိသ့ၣ်တဖၣ် ဒီး ဖဲလါထီၣ် (၈) သီအနံၤဂီၤ (၁၀း၀၀) နၣ်ရံၣ်အဆၢကတီၢ် ပျၢ်လီၤက့ၤဝဲ သဝီဖိ (၂၄) ဂၤ ဒီး အိၣ်တ့ၢ်တဂၤတခီ ပဲၤအၢပဲၤသီဝဲလၢ အတၢ်ဆဲးကျိးအိၣ်ဒီး (PDF) န့ၣ်လီၤ.

၂၀၂၂ နံၣ် လါအီကူးထီၣ် (၅) သီအနံၤ မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုးရ့ၣ် ခမရ-၃၄၉ ဒီး ၃၅၁ အသုးလၢအိၣ်ဖဲ သ့ၣ်ခၠးစ့း, ငလီးတဲး, သထ့ကိ တဖၣ် ခးလီၤဝဲကျိဖးဒိၣ် (၁၇) ဖျၢၣ်လၢ ပနၢ်ဝါပျီသဝီန့ၣ်လီၤ. သုးမီၤစိရိၤအသုးရ့ၣ် ခမရ-၃၄၉ ဒီး ၃၅၁ အပှၤတဖၣ် ကူသိးဒ်ကမျၢၢ်ဖိအသိး ဒီး ဟံဝဲတၢ်ဘံၣ်တၢ်ဘၢ စးထီၣ် သထ့ကိ ဒီး တုၤဆ့ကၠံန့ၣ်လီၤ. တနံၤဃီ သုးမီၤစိရိၤအသုးသ့ၣ်တဖၣ် ခးလီၤကဒီးကျိဖးဒိၣ် ခဲလၢၥ် (၁၆) ဖျၢၣ် လၢတခီပှၢ်သဝီပူၤန့ၣ်လီၤ. သုးမီၤစိရိၤအသုး ခးလီၤကျိဖးဒိၣ်ဘျီဝဲအံၤ ဘၣ်ဟးဂီၤဝဲ ကမျၢၢ်ဖိအဟံၣ် (၈) ဖျၢၣ်ဒီး ဘၣ်ဟးဂီၤဃုၥ်စ့ၢ်ကီး ကမျၢၢ်ဖိအဆဲၣ်ကဲၣ် (၂) ခိၣ်န့ၣ်လီၤ.
၂၀၂၂ နံၣ် လါအီကူးထီၣ် (၆) သီအနံၤ မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုးရ့ၣ် ၄၃၉ အသုးတဖၣ် ဖဲမုၢ်နၤခီ (၈း၀၀) အဆၢကတီၢ် ခးလီၤဝဲကျိဖးဒိၣ် ခဲလၢၥ် (၈) ဖျၢၣ်လၢ ပနၢ်ဝါပျီသဝီ ကပိၥ်ကပၤန့ၣ်လီၤ. စးထီၣ် လၢၢ်ဒိၣ်ဝ့ၢ် တုၤ မူဝ့ၢ် သုးမီၤစိရိၤအသုးတဖၣ် သူဝဲကမျၢၢ်အသိလ့ၣ်, ဆဲၣ်ကဲၣ် ဒီး ဖဲအဝဲသ့ၣ်တဖၣ် ဟးထီၣ်ဟးလီၤအဆၢကတီၢ် ကူသိးဝဲဒ်ကမျၢၢ်ဖိအသိးန့ၣ်လီၤ. သုးမီၤစိရီၤအသုး ခမရ-၅၅၉ ဒီး ပြည်သူ့စစ် တဖၣ် ဟဲနုၥ်လီၤဝဲဆူ တခီပှၢ်သဝီပူၤဝံၤ ဟံဆူၣ်ဝဲကမျၢၢ်အဆဲၣ်ကဲၣ် (၁) ခိၣ်ဝံၤ ဟးထီၣ်ဃိဝဲ ကမျၢၢ်ဖိအဟံၣ်အဃီ ဒီး ဒိသံအီၣ်ဃုၥ်စ့ၢ်ကီး ကမျၢၢ်ဖိအမဲၣ်တဲးလဲး (၃) ဒုန့ၣ်လီၤ.
၂၀၂၂ နံၣ် လါအီကူးထီၣ် (၇) သီအနံၤ လၢၢ်ဒိၣ်ကီၢ်ဆၣ် ဟီၣ်ကဝီၤပူၤ သုးမီၤစိရိၤအသုး လၢအိၣ်ဖဲ ပရဲလိၥ်ကျိ အမုၢ်နုၥ်တဖၣ် ခးလီၤဝဲကျိဖးဒိၣ် (၅) ဖျၢၣ်ဆူ ပရဲလိၥ်ကျိ အမုၢ်ထီၣ်တကပၤ ဒီး လီၤတဲၥ်ဝဲဖဲ လ့ၣ်ပ့ၣ်သဝီ ကပိၥ်ကပၤ ဒီး ဘၣ်ဒိဝဲ လ့ၣ်ပ့ၣ်သဝီဖိ တဂၤန့ၣ်လီၤ. ဖဲဟါခီ (၄း၀၀) နၣ်ရံၣ်အဆၢကတီၢ် သုးမီၤစိရိၤအသုးတဖၣ် ဟဲနုၥ်လီၤဝဲဆူ ကၠီးစယ့းသဝီအဃိ ဒူသဝီ ဒ်အမ့ၢ် ကၠီးစယ့း, ပဲသီၣ်, လ့ၣ်ပ့ၣ်, သီဘူး, တီကၠီၣ်ပီး ကမျၢၢ်ဖိသ့ၣ်တဖၣ် ဘၣ်ဃ့ၢ်ထီၣ်ကွံၥ်ဝဲဆူ အသဝီ ဒီး လဲၤဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်န့ၣ်လီၤ.

၂၀၂၂ နံၣ် လါအီကူးထီၣ် (၈) သီအနံၤ မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုးရ့ၣ် (၄၃၉ ဒီး ၃၅၁) လၢအိၣ်ဖဲ ငလီးတဲးသဝီၤပူၤတဖၣ် ဒိလီၤပှီၢ်ကွံၥ်ဝဲ ကမျၢၢ်ဖိအဟံၣ်တြဲၤ ဒီး ဟံန့ၢ်ဆူၣ်ဝဲ ကမျၢၢ်ဖိတၢ်ဖိတၢ်လံၤ လၢအလီးကီဝဲသ့ၣ်တဖၣ်န့ၣ်လီၤ. သဝီဖိလၢ ဃ့ၢ်အိၣ်ခူသူၣ်သ့ၣ်တဖၣ် သုးမီၤစိရိၤအသုး တဟ့ၣ်အီၤတၢ်ပျဲလၢ ကဟဲက့ၤဟံအီၣ်တၢ်အီၣ်လၢ အသဝီပူၤဘၣ်န့ၣ်လီၤ. သဝီဖိလၢ ဟုသးတအိၣ်လၢၤဘၣ်သ့ၣ်တဖၣ် လၢတၢ်ပျံၤတၢ်ဖုးအဖီခိၣ် ဟဲက့ၤဟံအီၣ်ဟုသးလၢ အသဝီဒီး သုးမီၤစိရိၤအသုးတဖၣ် ခးပျံၤအီၤလၢကျိန့ၣ်လီၤ. ဟါခီ (၃း၀၀) နၣ်ရံၣ်အဆၢကတီၢ် သုးမီၤစိရိၤအသုး (၄၃၉) လၢဘၣ်တၢ်တီခိၣ်ရိၣ်မဲအီၤလၢ သုးရ့ၣ်ခိၣ် သဲးနဲၣ် အိၣ်ဖဲ ငလီးတဲးသဝီ သ့ၣ်တဖၣ် နဲၣ်လီၤဝဲအပှၤလၢ ကဘၣ်မီလီၤဝဲ ငလီးတဲးသဝီဖိ အကျီၢ်ပနၢ်သ့ၣ်တဖၣ် ဆူ တဲၣ်ပီၣ် ဒီး ဖိသီစူး ကမျၢၢ်ဖိ တၢ်ဖံးအီၣ်မၤအီၣ်အလီၢ်အကျဲပူၤန့ၣ်လီၤ. ဖဲဟါခီ (၃း၁၄) နၣ်ရံၣ်အဆၢကတီၢ် သုးမီၤစိရိၤအသုး (၄၃၉) သုးရ့ၣ်ခိၣ် (၂) အိၣ်ဖဲ သ့ၣ်ခၠၣ်ဆ့း သုးကလၢၤ ဒီး မၢဝဲအပှၤတဖၣ် မီနုၥ်ကမျၢၢ်ဖိအကျီၢ် (၃) ဒုလၢ သ့ၣ်ခၠၣ်ဆ့း ကၠိကရၢၢ်ပူၤ ဒီး မၤသံဖီအီၣ်ကွံၥ်ဝဲဒၣ်န့ၣ်လီၤ.

၂၀၂၂ နံၣ် လါအီကူးထီၣ် (၁၀) သီအနံၤ မူကီၢ်ဆၣ်ဟီၣ်ကဝီၤပူၤ ဖဲဂီၤခီ (၉း၁၁) နၣ်ရံၣ်အဆၢကတီၢ် သုးမီၤစိရိၤအသုးရ့ၣ် ခမရ-၄၃၉ အသုးတဖၣ် ဖီၣ်ဝဲ တၢၣ်ပီၢ်သဝီဖိ (၄) ဂၤအကျါ ပၣ်ဃုၥ်ဒီး ပိၥ်မုၣ် (၂) ဂၤ ဒီး ဖိသၣ် (၁) ဂၤန့ၣ်လီၤ. ဖဲ ၁၀း၁၀ နၣ်ရံၣ်အဆၢကတီၢ် ပျၢ်လီၤကွံၥ်ဝဲ ပိၥ်မုၣ် (၂) ဂၤ ဒီး ဖိသၣ် (၁) ဂၤ ဒီး မ့မ့ၢ်သဝီဖိ ပိၥ်ခွါတဂၤ တုၤခဲအံၤ တပျၢ်ကွံၥ်ဝဲဒံးဘၣ်န့ၣ်လီၤ. ဖဲဟါခီ (၂း၀၀) နၣ်ရံၣ်အဆၢကတီၢ် သုးမီၤစိရိၤအသုးရ့ၣ် ခမရ-၄၃၉ အသုးတဖၣ် ခးလီၤဝဲကျိဖးဒိၣ် (၈) ထံၣ် ဒီးလီၤတဲၥ်ဝဲဖဲ သ့ၣ်ခၠၣ်ဆ့း, ငလီးတဲး, ပနၢ်ဝါပျီ, နိၣ်ခိၣ်ထံ သဝီအကပိၥ်ကပၤန့ၣ်လီၤ. ဖဲဟါခီ (၅း၀၀) အဆၢကတီၢ် သုးမီၤစိရိၤအသုး ခးပျံၤဝဲ ကမျၢၢ်ဖိတဂၤ လၢကျိဖးဒိၣ် (၈) ထံၣ် ဖဲကမျၢၢ်ဖိက့ၤဟံအီၣ်ဟုသးလၢ အစံၥ်ဒဲအဆၢကတီၢ်န့ၣ်လီၤ.
၂၀၂၂ နံၣ် လါအီကူး (၁၁) သီအနံၤ မူကီၢ်ဆၣ် ဟီၣ်ကဝီၤပူၤ ဖဲဂီၤခီ (၅း၀၀) နၣ်ရံၣ်အဆၢကတီၢ် သုးမီၤစိရီၤအသုးတဖၣ် ဖီၣ်ဝဲသဝီဖိတဂၤ သမံသမိးဝဲ၀ံၤ ပျၢ်လီၤကွံၥ်ဝဲဒၣ်န့ၣ်လီၤ. ဖဲမုၢ်ဃ့ၢ်လီၤ (၁း၀၀) နၣ်ရံၣ်အဆၢကတီၢ် သုးမီၤစိရိၤအသုး လၢအိၣ်ဖဲ သ့ၣ်ခၠးဆ့းတဖၣ် ခးလီၤဝဲကျိဖးဒိၣ် (၁၅) ဖျၢၣ် ဆူ နိၣ်ခိၣ်ထံ ဒီး ပနၢ်ဝါပျီ သဝီပူၤန့ၣ်လီၤ. ဖဲဟါလီၤခီ (၄း၀၀) နၣ်ရံၣ်အဆၢကတီၢ် သုးမီၤစိရိၤအသုးရ့ၣ် ခမရ-၄၃၉ သုးရ့ၣ်ခိၣ် သဲးနဲၣ် ဒီး အပှၤတဖၣ် လၢအအိၣ်ဖဲ ငလီးတဲးသဝီပူၤတဖၣ် သုးထီၣ်ကွံၥ်အသးဆူ ကၠိကိသဝီပူၤ အဆၢကတီၢ် ဖီၣ်အီၣ်ဃုၥ်ဝဲ ငလီးတဲးသဝီဖိ အကျီၢ် (၂) ဒုန့ၣ်လီၤ.
၂၀၂၂ နံၣ် လါအီကူးထီၣ် (၁၃) သီအနံၤ မူကီၢ်ဆၣ် ဟီၣ်ကဝီၤပူၤ ဖဲဂီၤခီ (၁၀း၀၀) နၣ်ရံၣ်အဆၢကတီၢ် သုးမီၤစိရိၤအသုး လၢအိၣ်ဖဲ အီလီစ့ၣ် သုးကလၢၤပူၤတဖၣ် ဖီၣ်ဝဲ အီလီစ့ၣ် သဝီဖိ (၂) ဂၤ မၤပျံၤမၤဖုးဝဲ, မၤဆူးမၤဆါဝဲ ဒီး သဝီဖိအကျါတဂၤ သုးမီၤစိရိၤအသုး ဟံဆူၣ်ဝဲအစ့ပယီၤ (၃၀၀၀၀) သၢကလးကၠးဒီး ဖဲဟါလီၤခီ (၂း၀၀) နၣ်ရံၣ်အဆၢကတီၢ် ပျၢ်လီၤက့ၤဝဲ သဝီဖိခံဂၤအံၤန့ၣ်လီၤ. ဖဲဟါခီ (၆း၀၀) နၣ်ရံၣ်အဆၢကတီၢ် သုးမီၤစိရိၤအသုး လၢအိၣ်ဖဲ သ့ၣ်ခၠၣ်ဆ့းတဖၣ် ဖီၣ်ဝဲသဝီဖိ (၁) ဂၤဝံၤ ဒီး ကမျၢၢ်ဖိလဲၤဖံးလဲၤမၤတၢ်အကျဲ တိၤသ့ၣ်တဖၣ် သုးမီၤစိရိၤအသုး ကျီကၢ်ကွံၥ်ဝဲဒၣ်န့ၣ်လီၤ.
၂၀၂၂ နံၣ် လါအီကူးထီၣ် (၁၄) သီအနံၤ လၢၢ်ဒိၣ်ကီၢ်ဆၣ် ဟီၣ်ကဝီၤပူၤ သုးမီၤစိရိၤအသုး လၢအိၣ်ဖဲ သမ့ၣ်အ့ကိ တၢ်သွၣ်ခိၣ်တဖၣ် ဖဲဂီၤ (၈း၂၀) နၣ်ရံၣ်အဆၢကတီၢ် ခးလီၤဝဲကျိဖးဒိၣ် (၂) ဖျၢၣ်လၢ ဝ့ၢ်ဒီခိၣ်သဝီပူၤ ဒီး ခးလီၤကဒီးဝဲ ကျိဖးဒိၣ် (၁) ဖျၢၣ်လၢ ပဲသီၣ်သဝီပူၤန့ၣ်လီၤ.
၂၀၂၂ နံၣ် လါအီကူးထီၣ် (၁၅) သီအနံၤ လၢၢ်ဒိၣ်ကီၢ်ဆၣ် ဟီၣ်ကဝီၤပူၤ ဖဲဂီၤခီ (၈း၅၈) နၣ်ရံၣ်အဆၢကတီၢ် သုးမီၤစိရီၤအသုးတဖၣ် ခးလီၤဝဲကျိဖးဒိၣ် (၂) ဖျၢၣ် ဒီး လီၤတဲၥ်ဝဲဖဲ သူကဘံ သီခါဖၠၣ်တဖျၢၣ် ဒီး ထဲးထူၣ်သဝီကပၤတဖျၢၣ်န့ၣ်လီၤ.
၂၀၂၂ နံၣ် လါအီကူးထီၣ် (၁၅) သီအနံၤ မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုးရ့ၣ် (၆၀၃) အိၣ်ဖဲ ကၠိပ့ၣ်ဆ့းတဖၣ် ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ် (၂) ဂၤ ဒီး ဖဲလါအီကူးထီၣ် (၁၇) သီအနံၤ မၤသံကွံၥ်ဝဲ ကမျၢၢ်ဖိလၢ ဖီၣ်ဝဲ (၂) ဂၤအံၤန့ၣ်လီၤ.
၂၀၂၂ နံၣ် လါအီကူးထီၣ် (၂၀) သီအနံၤ မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုး ခမရ (၄၃၉) ဒီး ခမရ (၅၉၀) အသုးတဖၣ် တဲပျံၤကမျၢၢ်လၢ အဝဲသ့ၣ်တဖၣ် မ့ထံၣ်ကမျၢၢ်အိၣ်လၢ သဲးကျါကၢကျါ ကခးသံဝဲခဲလၢၥ်န့ၣ်လီၤ. တကတီၢ်ဃီ သုးမီၤစိရိၤအသုးသ့ၣ်တဖၣ် ခးလီၤဝဲကျိဖးဒိၣ်လၢ မီကဲသၣ်ပၢၤခိၣ်သဝီအဃိ မီကဲသၣ်ပၢၤခိၣ် တၢ်သိၣ်လိကၠိ ဘၣ်ပတုၥ်ကွံၥ်ဝဲ ဒီး ကၠိသရၣ်/ကၠိသရၣ်မုၣ် ဒီး ကၠိဖိတဖၣ် ဘၣ်ဃ့ၢ်ပြံဃ့ၢ်ပြါကွံၥ်ဝဲဒၣ်န့ၣ်လီၤ. တကးဒံးဘၣ် မီကဲသၣ်ပၢၤခိၣ်သဝီ, မးလးဒီသဝီ, တၢၢ်ကွဲၤလ့ခိၣ်သဝီ ကမျၢၢ်ဖိ (၃၁၁၇) ဂၤ ဘၣ်ဃ့ၢ်အိၣ်ခူသူၣ်ဝဲလၢ တၢ်ပူၤဖျဲးအလီၢ်န့ၣ်လီၤ.
၂၀၂၂ နံၣ် လါအီကူးထီၣ် (၂၂) သီအနံၤ မူကီၢ်ဆၣ်ဟီၣ်ကဝီၤပူၤ ၀ၣ်မ့လူၢ်သဝီဖိတဖၣ် လဲၤဃုအီၣ်တၢ်အီၣ်လၢ သဝီအဂၤအဆၢကတီၢ် သုးမီၤစိရိၤအသုး ခလရ (၆၀) ဒီး ခမရ (၃၅၁) အသုးတဖၣ် သ့ၣ်ညါထွဲဝဲအဃိ ဆီလီၤအသုးလၢ ကမျၢၢ်ဖိကဟဲက့ၤကျဲအဃိ ကမျၢၢ်ဖိလၢ လဲၤဃုအီၣ်တၢ်အီၣ်တဖၣ် ဟဲက့ၤဝဲလၢ အအိၣ်တၢ်လီၢ်တသ့လၢၤဝဲဘၣ်န့ၣ်လီၤ.

၂၀၂၂ နံၣ် လါအီကူးထီၣ် (၂၃) သီအနံၤ မူကီၢ်ဆၣ်ဟီၣ်ကဝီၤပူၤ ဖဲဂီၤခီ (၇း၀၀) နၣ်ရံၣ်အဆၢကတီၢ် သုးမီၤစိရိၤအသုး ကဘီယူၤ ဟဲခးလီၤတၢ် ဒီး တ့ၢ်လီၤဃုၥ်စ့ၢ်ကီး မ့ၣ်ပိၢ်ဖဲ တၢၢ်ကွဲၤလ့ခိၣ် ဟီၣ်ကဝီၤပူၤ ဒီး တကတီၢ်ဃီ သုးမီၤစိရိၤအသုး ခလရ (၃၉) သုးလၢအိၣ်ဖဲ သပၠ့ၣ်ညိၣ် သုးကလၢၤတဖၣ် ခးလီၤစ့ၢ်ကီးဝဲ ကျိဖးဒိၣ်လၢ မးလးဒီသဝီပူၤ (၃) ဖျၢၣ်န့ၣ်လီၤ. ဖဲဂီၤခီ (၇း၂၀) နၣ်ရံၣ်အဆၢကတီၢ် သုးမီၤစိရိၤအသုး ကဘီယူၤ ဟဲခးလီၤကဒီးတၢ်လၢ မးလးဒီကရူၢ် ဟီၣ်ကဝီၤပူၤတဘျီကဒီးန့ၣ်လီၤ. ဖဲဟါခီ (၅း၅) နၣ်ရံၣ်အဆၢကတီၢ် သုးမီၤစိရိၤအသုး ခလရ (၃၉) ခးလီၤကဒီးကျိဖးဒိၣ် (၅) ဖျၢၣ်လၢ မးလးဒီကရူၢ်ဟီၣ်ကဝီၤပူၤ ဘၣ်ဟးဂီၤဝဲ ကမျၢၢ်ဖိအဟံၣ် တဖျၢၣ်န့ၣ်လီၤ.

၂၀၂၂ နံၣ် လါအီကူးထီၣ် (၂၆) သီအနံၤ မူကီၢ်ဆၣ်ဟီၣ်ကဝီပူၤ သုးမီၤစိရိၤအသုး ခမရ (၆၀၃) ခးဝဲ အီလီစံၣ်သဝီဖိ (၂) ဂၤဖဲ သဝီဖိခံဂၤအံၤ ဒိးဆဲၣ်ကဲၣ် ဒီး ဟးလၢကျဲအဆၢကတီၢ်န့ၣ်လီၤ. သဝီဖိခံဂၤအံၤ လၢတၢ်ပျံၤတၢ်ဖုးအပူၤ ပၥ်တ့ၢ်ကွံၥ်ဆဲၣ်ကဲၣ် ဒီး ဃ့ၢ်ပူၤဖျဲးအသး ဒီး သုးမီၤစိရိၤအသုးတဖၣ် ဟံန့ၢ်ဝဲသဝီဖိခံဂၤ အဆဲၣ်ကဲၣ်န့ၣ်လီၤ.
၂၀၂၂ နံၣ် လါအီကူးထီၣ် (၂၇) သီအနံၤ မူကီၢ်ဆၣ်ဟီၣ်ကဝီၤပူၤ ဖဲဂီၤခီ (၉း၀၀) နၣ်ရံၣ်အဆၢကတီၢ် သုးမီၤစိရိၤအသုး အိၣ်ဖဲ တဲၣ်ပီၣ် ဒီး မၠဲးယဲ အဘၢၣ်စၢၤတဖၣ် ခးလီၤဝဲကျိဖးဒိၣ်ဆူ မၠဲးယဲသဝီဟီၣ်ကဝီၤပူၤ ခဲလၢၥ် (၃၈) ဖျၢၣ်န့ၣ်လီၤ. ဖဲမုၢ်နၤခီ (၉း၃၀) နၣ်ရံၣ်အဆၢကတီၢ် သုးမီၤစိရိၤအသုး ခမရ (၅၉၀) တဖၣ် ခးလီၤဝဲကျိဖးဒိၣ် (၃) ဖျၢၣ်လၢ တခီးပှၢ်သဝီပူၤ ဒီး ဘၣ်ဟးဂီၤဝဲ တခီးပှၢ်သဝီ ဖိသၣ်ဆံးကတီၤဆိကၠိ တဖျၢၣ် ဒီး တၢ်သူၣ်ထီၣ်အဂၤတဖျၢၣ်န့ၣ်လီၤ.

၂၀၂၂ နံၣ် လါအီကူးထီၣ် (၂၈) သီအနံၤ မူကီၢ်ဆၣ်ဟီၣ်ကဝီၤပူၤ ဖဲမုၢ်ထူၣ် (၁၂) အကတီၢ်ပူၤ သုးမီၤစိရိၤအသုး လၢအိၣ်ဖဲ ဆ့းကၠံ တဖၣ် ခးလီၤဝဲကျိဖးဒိၣ် (၂)ဖျၢၣ်လၢ အ့နဲးသဝီပူၤန့ၣ်လီၤ. ဖဲဟါခီ (၆း၅၉) နၣ်ရံၣ်အဆၢကတီၢ် သုးမီၤစိရိၤအသုး အိၣ်ဖဲ ငပၠဲးအ့တဖၣ် ခးလီၤဝဲကျိဖးဒိၣ် (၃) ဖျၢၣ်လၢ ကမျၢၢ်ဖိ အတၢ်ဖံးအီၣ်မၤအီၣ်လီၢ်ကျဲ သ့ၣ်တဖၣ်န့ၣ်လီၤ. ဖဲမုၢ်နၤခီ (၈း၁၀) နၣ်ရံၣ်အဆၢကတီၢ် သုးမီၤစိရိၤအသုး အိၣ်ဖဲ မၠဲးယဲ ဒီး သ့ၣ်ခၠးဆ့းတဖၣ် ခးလီၤဝဲကျိဖးဒိၣ်ဆူ ကမျၢၢ်ဖိတၢ်ဖံးအီၣ်မၤအီၣ်လီၢ်ကျဲ ခဲလၢၥ် (၆) ဖျၢၣ်န့ၣ်လီၤ. သုးမီၤစိရိၤအသုးတဖၣ် မၤသံဝဲ မံတဲၣ်ဒီသဝီသးပှၢ် ဒီး ဖဲမုၢ်နၤခီ (၉း၀၀) နၣ်ရံၣ်အဆၢကတီၢ် သဝီဖိတဖၣ် ထံၣ်ဝဲ မံတဲၣ်ဒီသဝီသးပှၢ် အသံစိၣ်လၢ မံတံၣ်ဒီသဝီ တိၤခိၣ်ထီးန့ၣ်လီၤ.

၂၀၂၂ နံၣ် လါအီကူးထီၣ် (၂၉) သီအနံၤ မူကီၢ်ဆၣ်ဟီၣ်ကဝီၤပူၤ သုးမီၤစိရိၤအသုး အိၣ်ဖဲ မၠဲးယဲ (ပယီၤသဝီ), သ့းခၠးဆ့းသဝီ, သထ့ကိသဝီ သ့ၣ်တဖၣ် ခးလီၤဝဲကျိဖးဒိၣ် (၃၀) ဖျၢၣ်ဆူ နိၣ်ခိၣ်ထံသဝီ, ယွၣ်တါရှ့ၣ်သဝီ, ဖိဆံၣ်ခိၣ်သဝီ, ပနၢ်ဝါပျီသဝီသ့ၣ်တဖၣ် အပူၤန့ၣ်လီၤ. သုးမီၤစိရိၤအသုးသ့ၣ်တဖၣ် ကျီတဲၥ်ကွံၥ်ဝဲ ကမျၢၢ်ဖိအကျီၢ်ပနၢ်အပျံၤ ဒီး နီလီၤဝဲဆူ ကမျၢၢ်ဖိအစံၥ်ပူၤ ဒီး ကျီၢ်ပနၢ်သ့ၣ်တဖၣ် ဟးအီၣ်ကွံၥ်ဝဲ ကမျၢၢ်ဖိအဘု, အတၢ်သူၣ်တၢ်ဖျးသ့ၣ်တဖၣ်န့ၣ်လီၤ.

၂၀၂၂ နံၣ် လါအီကူးထီၣ် (၃၀) သီအနံၤ ဆီထံးကီၢ်ဆၣ် ဟီၣ်ကဝီၤပူၤ ဖဲဂီၤခီ (၅း၀၀ ဒီး ၆း၀၀) အဘၢၣ်စၢၤ သုးမီၤစိရိၤအသုး အိၣ်ဖဲ သၣ်ဆ့းတဖၣ် ခးလီၤဝဲကျိဖးဒိၣ်လၢ သၣ်ဆ့းသဝီပူၤအဃိ ဘၣ်သံဝဲကမျၢၢ်ဖိ (၂) ဂၤန့ၣ်လီၤ.

သုးမီၤစိရိၤ အတၢ်မၤထီဒါ ဟီၣ်ခိၣ်ဖိခွဲးယၥ် ဒီး နုၥ်လီဟံန့ၢ်ဝဲ ဟီၣ်ကဝီၤတၢ်ဒိၣ်စိ တကးဘၣ် ဟူးဂဲၤစ့ၢ်ကီးဝဲ ဒုးယၤဂ့ၢ်ဝီအ တၢ်ရဲၣ်တၢ်ကျဲၤအဃိ လၢတၢ်ဒီသဒၢလီၤက့ၤ ဟီၣ်ကဝီၤ ဒီး တၢ်ဒီသဒၢက့ၤ ကမျၢၢ်ဖိအတၢ်ဘံၣ်တၢ်ဘၢအဂီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ (၃) စုဒုၣ်တီၤဖီလၥ် သုးရ့ၣ် (၇), သုးရ့ၣ် (၈), သုးရ့ၣ် (၉) ဒီး ဂၢၤသးသုးရ့ၣ် (၃) သ့ၣ်တဖၣ် ဘၣ်ကွၢ်ဆၢၣ်မဲၥ် ဒုးတၢ်ဒီး သုးမီၤစိရိၤအသုးသ့ၣ်တဖၣ် ကိးနံၤဒဲးန့ၣ်လီၤ. ဒီတလါအကတီၢ်ပူၤ တၢ်ဒုးဖးဒိၣ်, တၢ်ဒုးဖိ ကဲထီၣ်ဝဲခဲလၢၥ် (၄၇) ဘျီ ဒီး သုးမီၤစိရိၤအသုး သံဝဲ (၇၃) ဂၤ ဒီး ဘၣ်ဒိဝဲ (၄၁) ဂၤန့ၣ်လီၤ. သုးမီၤစိရိၤအသုးသံအကျါ ပၣ်ဃုၥ်ဒီး သုးရ့ၣ်ခိၣ်တဂၤ, သုးရ့ၣ်ခိၣ် (၂) တဂၤ, သုးခိၣ်စိတဂၤ, သုးခိၣ်ယီၤတဂၤ, သုးစကီၤတဂၤန့ၣ်လီၤ.


ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ တချုးဒံးလၢ သုးမီၤစိရိၤဟံဆူၣ် တၢ်စိတၢ်ကမီၤဒံးဘၣ် အဆၢကတီၢ် လၢၢ်ဒိၣ်ကီၢ်ဆၣ် ဂၢၤသးသုးရ့ၣ် (၃) ဟီၣ်ကဝီၤပူၤ ခီဖျိလၢ သုးမီၤစိရိၤအသုးသ့ၣ်တဖၣ် မၤလဲၢ်ထီၣ်ဝဲ အသုးသိလ့ၣ်ကျဲလၢ လဲၤထီၣ်ဆူ မုၢ်သဲၣ် ဒီး ဆူသုးက့ (၅) တကပၤအဃိ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့ (၃) ဒုးအိၣ်ထီၣ်ဝဲ သုးက့ပတီၢ် သုးကျိၤ လၢအပၣ်ဃုၥ် ဒီး သုးရ့ၣ် (၇), သုးရ့ၣ် (၈), သုးရ့ၣ် (၉) ဒီး ဂၢၤသးသုးရ့ၣ် (၃) န့ၣ်လီၤ. တချုးဒံးလၢ သုးမီၤစိရိၤဟံဆူၣ် တၢ်စိတၢ်ကမီၤဒံးဘၣ်အခါ သုးက့ (၃) ဟီၣ်ကဝီၤပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ ခဲအံၤခဲအံၤလၢ မုၢ်သဲၣ်သိလ့ၣ်ကျဲအဃိ ကမျၢၢ်ဖိလၢ အိၣ်ဘူးဒီးသိလ့ၣ်ကျဲတဖၣ် ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် ကမျၢၢ်ဖိနီၣ်ဂံၢ် အိၣ်ဝဲလၢ (၆၀၀၀) ဘျဲၣ်န့ၣ်လီၤ. စးထီၣ်သုးမီၤစိရိၤဟံန့ၢ်ဆူၣ် တၢ်စိတၢ်ကမီၤဒီး တုၤ ၂၀၂၂ နံၣ် လါယူၤလံလၢၥ် တၢ်ပၥ်ဖှိၣ်က့ၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်တဖၣ် အနီၣ်ဂံၢ်အိၣ်ဝဲ (၆၁၈၉၈) ဂၤ ဒီး လါအီကူးတလါအကတီၢ်ပူၤ ကမျၢၢ်ဖိဘၣ်ဃ့ၢ်အိၣ်ခူသူၣ် လၢတၢ်ပူၤဖျဲးအလီၢ် အနီၣ်ဂံၢ်အါထီၣ်ဝဲ (၂၀၁၈၄) ဂၤန့ၣ်လီၤ. ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ် အနီၣ်ဂံၢ်ခဲလၢၥ်အိၣ်ဝဲ (၈၂၀၈၂) ဂၤလံန့ၣ်လီၤ. ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်သ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲအါမံၤ ဒီး လိၣ်ဘၣ်ဝဲ တၢ်ဆီၣ်ထွဲမၤစၢၤန့ၣ်လီၤ.