Notice

  "From the Karen National Political Dialogue to ward the Political Will of the Karen National"  

  "From the Karen National Political Dialogue to establish a Federal Democratic Union"  

  • English
  • Karen
  • Myanmar

News

News

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဒူပျၥ်ယၥ်ကီၢ်ရ့ၣ်, သုးက့ (၆) ဟီၣ်ကဝီၤပူၤ ၂၀၂၂ နံၣ် လါအီကူးထီၣ် (၁) သီ တုၤ လါအီကူး (၂၀) သီအနံၤ တၢ်ဒုးကစီၣ်


၂၀၂၂ နံၣ် လါအီကူး ၂၄ သီ ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဒူပျၥ်ယၥ်ကီၢ်ရ့ၣ်, သုးက့ (၆) ဟီၣ်ကဝီၤပူၤ သုးမီၤစိရိၤအသုး လၢဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤတဖၣ် မ့ၢ်ဝဲ တပ်မ (၁၁), တပ်မ (၂၂), တပ်မ (၄၄) စုဒုၣ်တီၤဖီလၥ် သုးရ့ၣ် (၁၇) ဘ့ၣ် ဒီး သုးခိးကီၢ်ဆၢ သုးရ့ၣ်တဘ့ၣ် န့ၣ်လီၤ. သုးမီၤစိရိၤအသုးရ့ၣ် လၢပမၤလီၤတံၢ်အသုးရ့ၣ်နီၣ်ဂံၢ် တန့ၢ်ဒံးဘၣ်သ့ၣ်တဖၣ် အိၣ်ဒံးစ့ၢ်ကီးဝဲဒၣ်န့ၣ်လီၤ.
ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ (၆) စုဒုၣ်တီၤဖီလၥ် သုးရ့ၣ်လၢခီၣ်ဆၢ ဒုးသုးမီၤစိရိၤတဖၣ် မ့ၢ်ဝဲ သုးရ့ၣ် (၁၆), သုးရ့ၣ် (၁၇), သုးရ့ၣ် (၁၈), သုးရ့ၣ် (၂၇), သုးရ့ၣ် (၂၀၁) ကညီဒီကလုၥ် ဂၢၤသးကရၢ ဝဲၤလီၢ်ခိၣ်သ့ၣ် ဘံၣ်ဘၢသုးရ့ၣ်, ကညီဒီကလုၥ်ဂၢၤသးကရၢ သုးရ့ၣ် (၆) သ့ၣ်တဖၣ်န့ၣ်လီၤ. လၢတၢ်ဒုးခီၣ်ဆၢ သုးမီၤစိရိၤအသုးတဖၣ်အဂီၢ် သုးက့ပတီၢ် ဒုးအိၣ်ထီၣ်ဝဲ သုးက့ဝဲၤလီၢ်ခိၣ်သ့ၣ် သုးကျိၤတဘိ ဒီး သုးရ့ၣ်သ့ၣ်တဖၣ်စ့ၢ်ကီး လၢအဒုးယၤဟီၣ်ကဝီၤဒၣ်ဝဲအပူၤ ဒုးအိၣ်ထီၣ်စ့ၢ်ကီး သုးကျိၤသ့ၣ်တဖၣ်န့ၣ်လီၤ.
၂၀၂၂ နံၣ် လါအီကူးထီၣ် (၁) သီအနံၤ တုၤ လါအီကူးအသီ (၂၀) အနံၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ (၆) စုဒုၣ်တီၤဖီလၥ် သုးရ့ၣ်တဖၣ် ဒီး သုးမီၤစိရိၤအသုး, သုးခိးကီၢ်ဆၢ အသုးသ့ၣ်တဖၣ် အဘၢၣ်စၢၤ တၢ်ဒုးဖးဒိၣ်, တၢ်ဒုးဖိ ကဲထီၣ်ဝဲခဲလၢၥ် (၃၃) ဘျီ ဒီး သုးမီၤစိရိၤအသုး သံဝဲ (၄၈) ဂၤဒီး ဘၣ်ဒိဝဲ (၈၀) ဂၤန့ၣ်လီၤ. သုးမီၤစိရိၤအသုး သံဒီးဘၣ်ဒိ လၢပမၤလီၤတံၢ် အနီၣ်ဂံၢ်တန့ၢ်ဒံးဘၣ်သ့ၣ်တဖၣ် အိၣ်ဒံးဝဲအါမးန့ၣ်လီၤ.
ကီးတရံးကီၢ်ဆၣ်, သုးရ့ၣ် (၁၈) ဒီး သုးရ့ၣ် (၂၇) ဟီၣ်ကဝီၤပူၤ တၢ်ဒုးကဲထီၣ်ဝဲအါကတၢၢ် ဒီး သုးရ့ၣ် (၂၇) စုဒုၣ်တီၤဖီလၥ် ဂုၢ်သီ (ခိၣ်ဘြၣ်) သုးကျိၤဒုးယၤဟီၣ်ကဝီၤပူၤ တၢ်ဒုးဆူၣ်ဝဲဒၣ်န့ၣ်လီၤ. ခီဖျိလၢ တၢ်ဒုးဆူၣ်ဒီး သုးမီၤစိရိၤအသုးသ့ၣ်တဖၣ် သံဒီးဘၣ်ဒိ အါအဃိ သူဝဲကျိဖးဒိၣ်အကလုၥ်ကလုၥ် သူဃုၥ်ဒီးကဘီယူၤဒုးသုးသ့ၣ်တဖၣ် ဒီး ဟဲထီၣ်ခးဝဲ သုးရ့ၣ် (၁၈) ဒီး သုးရ့ၣ် (၂၇) တၢ်လီၢ်သ့ၣ်တဖၣ်န့ၣ်လီၤ. အသီ (၂၀) ကတီၢ်ပူၤ သုးမီၤစိရိၤအသုး သူဝဲကဘီယူၤဒုးသုးဒီး ဟဲထီၣ်ဒုးဝဲ သုးရ့ၣ် (၁၈) ဒီး သုးရ့ၣ် (၂၇) ခဲလၢၥ်အိၣ်ဝဲ (၆) ဘျီန့ၣ်လီၤ. သုးမီၤစိရိၤအကဘီယူၤဒုးသုး ဟဲခးလီၤတၢ်လၢ သုးရ့ၣ် (၁၈) ဒီး သုးရ့ၣ် (၂၇) ဟီၣ်ကဝီၤပူၤ ဘၣ်ဆၣ် ကညီဒီကလုၥ် တၢ်ထူၣ်ဖျဲးသုးမုၢ်သံၣ်ဘိသ့ၣ်တဖၣ် တၢ်ဘၣ်ဒိဘၣ်ထံး တအိၣ်ဝဲနီတမံၤဘၣ်န့ၣ်လီၤ. ဟီၣ်ခိၣ်မဲၥ်ဖံးခိၣ် တၢ်ဒုးသဂၢၢ်အပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်တကပၤ ဟ့ၣ်လီၤအသးသမူလၢ ထံကီၢ်ဒီးကလုၥ်တၢ်သဘျ့အဂီၢ် (၂) ဂၤ ဒီးဘၣ်ဒိဝဲ (၁၆) ဂၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤ ခီဖျိတၢ်ဒုးကဲထီၣ် ကိးနံၤဒဲးဒီး သုးမီၤစိရိၤအသုးသ့ၣ်တဖၣ် ခးလီၤနါစိၤကျိဖးဒိၣ် ဒီး ဟဲခးလီၤတၢ်လၢကဘီယူၤအဃိ ကမျၢၢ် (၉၀၂၉၁) ဂၤဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်န့ၣ်လီၤ. ကမျၢၢ်လၢဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် လၢပဃုမၤလီၤတံၢ်အနီၣ်ဂံၢ်နီၣ်ဒွး အဖၢမုၢ်အိၣ်ဒံးစ့ၢ်ကီးဝဲအါမးန့ၣ်လီၤ. ခီဖျိသုးမီၤစိရိၤအသုးသ့ၣ်တဖၣ် ခးလီၤနါစိၤကျိဖးဒိၣ်အဃိ ဘၣ်သံစ့ၢ်ကီးဝဲ ကမျၢၢ် (၁) ဂၤန့ၣ်လီၤ.