Notice

  "From the Karen National Political Dialogue to ward the Political Will of the Karen National"  

  "From the Karen National Political Dialogue to establish a Federal Democratic Union"  

  • English
  • Karen
  • Myanmar

News

News

Fighting between KNLA/KNDO and Tamadaw during December 2021 (Karen Version)

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ၂၀၂၁ နံၣ် လါဒံၣ်စ့ဘၢၣ် တလါအကတီၢ်ပူၤ တၢ်ဒုးကစီၣ်
၂၀၂၂ နံၣ်, လါယနူၤအါရံၤ ၅ သီ
ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်ကဝီၤပူၤ သုးမီၤစိရိၤအသုး ဒီး သုခိးကီၢ်ဆၢ အသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ, ဟီၣ်ကဝီၤတၢ်ဒိၣ်စိ အတၢ်ရဲၣ်တၢ်ကျဲၤ ဒီး မၤဘၣ်ဒိဝဲ ဟီၣ်ခိၣ်ဖိခွဲးယၥ်, တၢ်မၤပျံၤမၤဖုးကမျၢၢ်, မၢဆူၣ်ကမျၢၢ်သ့ၣ်တဖၣ်အိၣ်ဝဲ တပယူၥ်ဃီန့ၣ်လီၤ. ခီဖျိလၢ သုးမီၤစိရိၤအသုးသ့ၣ်တဖၣ် ဟူးဂဲၤဝဲလၢ ကီၢ်သူလ့ၤဟီၣ်ကဝီၤပူၤအဃိ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးမီၤစိရိၤအသုး, သုးခိးကီၢ်ဆၢအသုး သ့ၣ်တဖၣ်အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲကိးနံၤဒဲးန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်တီၤဖီလၥ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးမီၤစိရိၤအသုး, သုးခိးကီၢ်ဆၢအသုး အဘၢၢ်စၢၤ လၢတလါအကတီၢ်ပူၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲခဲလၢၥ် (၃၁၀) ဘျီ ဒီး သုးမီၤစိရိၤအသုး သံဝဲ (၂၆၇) ဂၤအကျါ ပၣ်ဃုၥ်ဒီး သုးရ့ၣ်ခိၣ် (၁) ဂၤ, သုးရ့ၣ်ခိၣ်ခံ (၁) ဂၤ, သုးဒ့ခိၣ် (၁၁) ဂၤ, သုးဒ့ခိၣ်ခံ (၁) ဂၤ, သုးကသံၣ်သရၣ် (၁) ဂၤ, သုးခိၣ်ပတီၢ် (၃) ဂၤ, သုးခိၣ်ဖိ (၁) ဂၤ, သုးစကီၤ (၁) ဂၤ, ဘၣ်ဒိဝဲ (၁၈၄) ဂၤအကျါပၣ်ဃုၥ် ဒီး သုးရ့ၣ်ခိၣ် (၂) ဂၤ, သုးဒ့ခိၣ် (၁) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ တခီဟ့ၣ်လီၤအသးလၢ ထံကီၢ်ဒီးကလုၥ်ဂီၢ် ခဲလၢၥ် (၈) ဂၤ ဒီး ဘၣ်ဒိဝဲ (၁၇) ဂၤန့ၣ်လီၤ.
ကီၢ်သူလ့ၤတၢ်ပၢဟီၣ်ကဝီၤပူၤ တၢ်ဒုးကဲထီၣ်အါကတၢၢ်န့ၣ်မ့ၢ်ဝဲ သုးက့ (၅), သုးက့ (၁), သုးက့ (၃) ဒီး သုးက့ (၆) ဟီၣ်ကဝီၤသ့ၣ်တဖၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ဖဲဘၣ်သဂၢၢ်ခးလိၥ်သး ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ တဘျီလၢ်လၢ် ခးနါစိၤဝဲ ကျိဖးဒိၣ်အါအါဂီၢ်ဂီၢ် ဒီး ဘၣ်ဟးဂီၤဝဲ ကမျၢၢ်ဖိအဟံၣ်အဃီ, ဆၣ်ဖိကီၢ်ဖိ ဒီး ဘၣ်ဒိဘၣ်ထံးကမျၢၢ်ဖိ အိၣ်စ့ၢ်ကီးဝဲဒၣ်န့ၣ်လီၤ. ကမျၢၢ်ဖိဘၣ်ဒိဝဲလၢ သုးမီၤစိရိၤအသုး, သုးခိးကီၢ်ဆၢအသုး ခးနါစိၤကျိဖးဒိၣ်အဃိ ခဲလၢၥ်အိၣ်ဝဲ (၂၀) ဂၤဃၣ်ဃၣ်န့ၣ်လီၤ. ကီၢ်သူလ့ၤတၢ်ပၢဟီၣ်ကဝီၤပူၤ ကမျၢၢ်ဖိ (၅၀၀၀၀) ယဲၢ်ကလးဃၣ်ဃၣ် ဘၣ်ဃ့ၢ်အိၣ်ခူသူၣ် ခီဖျိလၢ တၢ်ဒုးတၢ်ယၤ ကဲထီၣ်အသးဒီး သုးမီၤစိရိၤအသုး, သုးခိးကီၢ်ဆၢအသုးတဖၣ် ခါနါစိၤကျိဖးဒိၣ်မ့ၢ်ဂ့ၤ, ဟဲခးလီၤတၢ်လၢ ကဘီယူၤအဃိမ့ၢ်ဂ့ၤန့ၣ်လီၤ.