Notice

  "From the Karen National Political Dialogue to ward the Political Will of the Karen National"  

  "From the Karen National Political Dialogue to establish a Federal Democratic Union"  

  • English
  • Karen
  • Myanmar

News

News

လါနိၣ်ဝ့ဘၢၣ်ထီၣ် (၁) သီတုၤ (၁၁) သီ ကတီၢ်ပူၤ သုးမီၤစိရိၤအသုး, သုးခိးကီၢ်ဆၢအသုး တၢ်မၤထီဒါ ဟီၣ်ခိၣ်ဖိခွဲးယၥ် ဒီး တၢ်ဒုးကစီၣ် ခ့ၣ်အဲၣ်ယူၣ်-လီၢ်ခၢၣ်သး ၁၅-၁၁-၂၀၂၁

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ် သုးက့ (၁), ကီၢ်ရ့ၣ်တီအူ သုးက့ (၂), မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ သုးမီၤစိရိၤအသုး ဒီး သုးခိးကီၢ်ဆၢအသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး လီၢ်ကဝီၤတၢ်ဒိၣ်စိ တကးဘၣ် မၤဘၣ်ဒိဃုၥ်စ့ၢ်ကီးဝဲ ဟီၣ်ခိၣ်ဖိခွဲးယၥ် တၢ်မၤသ့ၣ်တဖၣ်န့ၣ်လီၤ.

၅-၁၁-၂၀၂၁ နံၤ, ခ့ၣ်အဲၣ်ယူၣ် ဖၣ်အၣ်ကီၢ်ဆၣ် အဟီၣ်ကဝီၤပူၤ သုးမီၤစိရိၤအသုး ခမရ (၄၀၉) ပၥ်ဖှိၣ်ထီၣ်အသး ဒီး သုးခိးကီၢ်ဆၢ BGF-၁၀၁၄ အသုးသ့ၣ်တဖၣ် ဒီး ဟဲထီၣ်ဝဲဆူ မဲးပူၣ်သဝီဃၢၤ ဒီး ခးလီၤဝဲကျိဖးဒိၣ်ဆူ မဲးပူၣ်သဝီပူၤ ဒီး လီၤဘၣ်ဝဲ စီၤခၠံးဝ့အဟံၣ်, အဟံၣ်ခိၣ်လီၤပှီၢ်ကွံၥ်ဝဲ တကပၤန့ၣ်လီၤ.

၆-၁၁-၂၀၂၁ နံၤ ခ့ၣ်အဲၣ်ယူၣ် ဖၣ်အၣ်ကီၢ်ဆၣ် အဟီၣ်ကဝီၤပူၤ သုးမီၤစိရိၤ အထံသုး အိၣ်ဖဲဃိၣ်လိၥ်ကျိ တိၤဆၢလၥ်တဖၣ် ဟဲထီၣ်ဝဲဒီးကဘီထံဒုးသုး ဆူမဲၢ်တရီလ့ ဒီး ခးနါစိၤကျိဖးဒိၣ် အထံၣ် (၃၀) အဃိ ကမျၢၢ်ဖိလၢ အိၣ်ဘူးဒီး မဲၢ်တရီလ့ တၢ်လီၢ်သ့ၣ်တဖၣ် ဘၣ်ပျံၤဘၣ်ဖုးတၢ် ဒိၣ်မးန့ၣ်လီၤ.

၆-၁၁-၂၀၂၁ နံၤ ခ့ၣ်အဲၣ်ယူၣ် ဘံလ့ကီၢ်ဆၣ် ဟီၣ်ကဝီၤပူၤ သုးမီၤစိရိၤအသုး အမြေၥက်တပ် (၃၁၄) ခးလီၤကျိဖးဒိၣ်ဆူ ကၠးတရီသဝီပူၤ ဒီး ဘၣ်ဟးဂီၤဝဲ ကၠးတရီသဝီဖိ တံကူကူၣ် ဒီး နီၢ်တၢ်က့ၣ် အဟံၣ်, ဟံၣ်တဒီးကၠိဟးဂီၤကွံၥ်ဝဲဒၣ်န့ၣ်လီၤ.

၁၁-၁၁-၂၀၂၁ နံၤ ခ့ၣ်အဲၣ်ယူၣ် ဖၣ်အၣ်ကီၢ်ဆၣ် ဟီၣ်ကဝီၤပူၤ သုးခိးကီၢ်ဆၢ သုးရ့ၣ် (၁၀၁၄) သုးခိၣ် တ့ၣ်ဝ့ ကိးဖှိၣ်ဝဲ ထံဖိနဲး, လၢၢ်ဃဲၥ်ဃီၥ်, နိၣ်တရ့, ကွံတခီ, ထံမဲးဘီ သဝီသးပှၢ်သ့ၣ်တဖၣ် ဖဲပျီဖိတိၤဃိၣ်ခိၣ် တၢ်လီၢ်ဒီး တဲဝဲသဝီသးပှၢ်သ့ၣ်တဖၣ်လၢ သါကဘၣ်ဟဲထီၣ်လၢ တးပီသုးကလၢၤပူၤ မၢဝဲသဝီသးပှၢ် တဲကျၢဝဲသုးက့ (၁) သုးတဖၣ် လၢတဘၣ်ခးသါဘၣ်, သုးက့ (၁) မ့ခးသါတခီ သါကခးဃုၥ်ဒီး သဝီဖိခဲလၢၥ်န့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်တီအူ သုးက့ (၂) ဟီၣ်ကဝီၤပူၤ စးထီၣ်လါနိၣ်ဝ့ဘၢၣ်အပူၤ သုးမီၤစိရိၤအသုး သ့ၣ်တဖၣ် မၤဃံးထီၣ်ဝဲ တၢ်သမံသမိးတၢ်လဲၤတၢ်က့ၤကျဲ တီအူ ဆူ လၢၢ်ဒိၣ်, တီအူ ဆူ ချၢၣ်လၥ်, တီအူ ဆူ လ့းသိၣ် ကျဲသ့ၣ်တဖၣ်န့ၣ်လီၤ. ကမျၢၢ်ဖိလၢ ဟးထီၣ်က့ၤလီၤသ့ၣ်တဖၣ် သုးမီၤစိရိၤအသုးတဖၣ် သမံသမိးဝဲ အလီတဲစိ, အထၢၣ်, မၤနီၣ်မၤဃါဝဲ ဒီး ဟံးဃၥ်စ့ၢ်ကီးဝဲ အလီတဲစိနီၣ်ဂံၢ် န့ၣ်လီၤ. သုးမီၤစိရိၤ အတၢ်ဟူးတၢ်ဂဲၤဒ်အံၤအဖီခိၣ် ကဲထီၣ်ဝဲတၢ်တံၥ်တၥ် လၢကမျၢၢ်ဖိသ့ၣ်တဖၣ် အဂီၢ်န့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, မုၢ်တြီၢ်ကီၢ်ရ့ၣ် သုးက့ (၅) ဒွဲၣ်လိကီၢ်ဆၣ် ဟီၣ်ကဝီၤပူၤ ဖဲ ၂-၁၁-၂၀၂၁ နံၤ သုးမီၤစိရိၤအသုး စကခ (၈) စုဒုၣ်တီၤဖီလၥ် ခမရ (၄၀၆) အိၣ်ဝဲဖဲ ထွံၣ်သံအုၣ်သီခါဖၠၣ်တဖၣ် ခးလီၤဝဲကျိဖးဒိၣ် (၅) ဖျၢၣ်, ကျိဖိအထံၣ် (၁၀၀) ဘျဲၣ် ဆူကမျၢၢ်အတၢ်ဖံးအီၣ်မၤအီၣ်အလီၢ်အကျဲအဃိ ကမျၢၢ်ဖိလၢ အိၣ်ဘူးအိၣ်တံၢ်သ့ၣ်တဖၣ် ဘၣ်ပျံၤဘၣ်ဖုးတၢ် ဘၣ်အိၣ်မူလၢ တၢ်ဘၣ်ယိၣ်အပူၤန့ၣ်လီၤ.

၉-၁၁-၂၀၂၁ နံၤ သုးမီၤစိရိၤအသုး စကခ (၈) စုဒုၣ်တီၤဖီလၥ် ခမရ (၄၀၆) အိၣ်ဖဲ (၂၁) တၢၣ် ကါကျဲခိၣ်တဖၣ် ဟဲထီၣ်ဝဲဆူ မးထီ ဒီး ဖဲဟဲလၢကျဲအဆၢကတီၢ် ခးနါစိၤကျိဖးဒိၣ် အထံၣ် (၅၀) ဆံ ဒီး ကျိဖိကအိၣ်အထံၣ် (၅၀၀၀) ဘျဲၣ်န့ၣ်လီၤ. ခးလီၤဝဲကျိဖးဒိၣ်လၢ ကါကျဲကပိၥ်ကပၤ လၢကမျၢၢ်ဖိဟးထီၣ်က့ၤလီၤအကျဲ, တၢ်ဖံးအီၣ်မၤအီၣ်အလီၢ်အကျဲ န့ၣ်လီၤ. ကမျၢၢ်ဖိသ့ၣ်တဖၣ် ကလဲၤက့ၤဖံးမၤအဂီၢ် ဘၣ်လဲၤဘၣ်က့ၤဝဲလၢ တၢ်ဘၣ်ယိၣ်အပူၤန့ၣ်လီၤ.

သုးမီၤစိရိၤအသုး ဒီး သုးခိးကီၢ်ဆၢအသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤအဃိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤ ဒ်အမ့ၢ် ကီၢ်ရ့ၣ်ဒူသထူၣ် သုးက့ (၁), ကီၢ်ရ့ၣ်တီအူ သုးက့ (၂), မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ဒီး သုးမီၤစိရိၤ, သုးခိးကီၢ်ဆၢ အသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲကိးနံၤဒဲးန့ၣ်လီၤ. စးထီၣ်လါနိၣ်ဝ့ဘၢၣ်ထီၣ် (၁) သီအနံၤ တုၤ (၁၁) သီအနံၤ တၢ်ဒုးကဲထီၣ်ဝဲ ခဲလၢၥ် (၉၀) ဘျီ ဒီး သုးမီၤစိရိၤအသုး သံဝဲခဲလၢၥ် (၈၅) ဂၤ ဒီး ဘၣ်ဒိဝဲ (၆၁) ဂၤန့ၣ်လီၤ. သုးမီၤစိရိၤအသုးသံအကျါ ပၣ်ဃုၥ်ဒီး သုးခိၣ်စိ (၁) ဂၤ, သုးခိၣ်ဖိ (၁) ဂၤ, သုးစကီၤဖိ (၂) ဂၤန့ၣ်လီၤ. ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်တခီ ဘၣ်ဒိဝဲ (၁) ဂၤန့ၣ်လီၤ.