သးစၢ် တၢ်ပၥ်ဖှိၣ်မၤသကိးတၢ် ဒီး တၢ်ကွၢ်ကဒါက့ၤ တၢ်မုၥ်တၢ်ခုၣ် တၢ်လဲၤကျဲ
ကီၢ်ဒီတဘ့ၣ် သးစၢ် တၢ်ပၥ်ဖှိၣ်မၤသကိးတၢ် ဒီး တၢ်ကွၢ်ကဒါက့ၤ တၢ်မုၥ်တၢ်ခုၣ် တၢ်လဲၤကျဲ တၢ်တၢၣ်ပီၣ်တဲသကိး
လါ အီးကထိဘၢၣ် ၃၁ သီ ၂၀၁၉ နံၣ်
ဖဲ လါအီးကထိဘၢၣ် ၃၁ သီ အနံၤ တၢ်မၤဝဲ ကီၢ်ဒီတဘ့ၣ် သးစၢ်သ့ၣ်တဖၣ် အတၢ်ပၥ်ဖှိၣ်မၤသကိးတၢ် ဒီး တၢ်ကွၢ်ကဒါက့ၤ တၢ်မုၥ်တၢ်ခုၣ် တၢ်လဲၤကျဲ တၢ်တၢၣ်ပီၣ်တဲသကိး အမူး တကတီၢ် ဖဲ ဝ့ၢ်တကူၣ် န့ၣ်လီၤ. တၢ်တၢၣ်ပီၣ်တဲသကိးဘျီဝဲအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ လဲၤထီၣ်ဝဲ ဒီး ရှဲပၠးဒုးသ့ၣ်ညါဘၣ် ခၢၣ်စးလၢအဟဲထီၣ်တဖၣ် ဘၣ်ဃး ကညီဒီကလုၥ် စၢဖှိၣ်ကရၢ အတၢ်အိၣ်ဆၢထၢၣ် ဒီး တၢ်ပၥ်သးလၢ တၢ်မုၥ်တၢ်ခုၣ် တၢ်လဲၤကျဲအဖီခိၣ်, ဒီး လၢတၢ်ဂဲၤလိၥ်လၢ ထံလီၢ်ကီၢ်ပူၤ တၢ်မုၥ်တၢ်ခုၣ်အဂီၢ် တၢ်တၤတၢ် ဒီး တၢ်ကီတၢ်ခဲလၢ တၢ်ဘၣ်ကွၢ်ဆၢမဲၥ်အီၤတဖၣ် တဲဒုးသ့ၣ်ညါဝဲဒၣ် န့ၣ်လီၤ. ကီၢ်ဒီတဘ့ၣ် သးစၢ် တၢ်ပၥ်ဖှိၣ်မၤသကိးတၢ် ဒီး တၢ်ကွၢ်ကဒါပဲၥ်ထံနီၤဖး တၢ်မုၥ်တၢ်ခုၣ် တၢ်လဲၤကျဲ တၢ်တၢၣ်ပီၣ် တဲသကိး အမူးအံၤ အတၢ်ပညိၣ်သ့ၣ်တဖၣ် ဘၣ်တၢ်ကတိၤပၥ်ဖျါထီၣ်အီၤလၢ ဒၤနူၣ် သးစၢ်တဂၤန့ၣ်လီၤ.
ဝ့ၢ်တကူၣ် ကီၢ်ခီ ပှၤဂ့ၢ်ဝီကိတိၥ် အူနဲၤငၤလ့ ပၥ်ဖျါထီၣ်ဝဲ တၢ်ဂဲၤလိၥ်လၢ ထံလီၢ်ကီၢ်ပူၤ တၢ်မုၥ်တၢ်ခုၣ်အံၤ အတၢ်မုၢ်လၢ်ကွၢ်စိတဖၣ် ဒီး ပဲၥ်ထံနီၤဖးပၠး ခၢၣ်စးတဖၣ်န့ၣ်လီၤ. တၢ်မုၥ်တၢ်ခုၣ်ခီးမံးရှၢၣ် အပှၤဟ့ၣ်ကူၣ်တၢ် အူလၣ်မီၤဆွ့ၣ် ဟ့ၣ်ခီဟ့ၣ်နီၤဝဲ ဘၣ်ဃး တၢ်ဂဲၤလိၥ်လၢ ထံလီၢ်ကီၢ်ပူၤ တၢ်မုၥ်တၢ်ခုၣ်ကတီၢ် တၢ်မုၢ်လၢ်ကွၢ်စိ, တၢ်ကီတၢ်ခဲတဖၣ် ဒီး တကီၢ်ခါ တၢ်ဖံးတၢ်မၤတဖၣ် န့ၣ်လီၤ. ကလုၥ်ဒူၣ် ပှၤဖီၣ်စုကဝဲၤကရၢ (တၢ်မုၥ်တၢ်ခုၣ်တၢ်မၤကရူၢ်) ခၢၣ်စး ဒီကထၢၣ် စလဲလယၤမိစၤခီ တၢၣ်ပီၣ်တဲသကိးဝဲ ဘၣ်ဃး ကလုၥ်ဒူၣ်ဖီၣ်စုကဝဲၤကရၢတဖၣ် အတၢ်မုၢ်လၢ်ကွၢ်စိ လၢထံလီၢ်ကီၢ်ပူၤ တၢ်မုၥ်တၢ်ခုၣ် အဖီခိၣ်, တၢ်ရဲၣ်တၢ်ကျဲၤလၢ တၢ်ကမၤဖျါထီၣ် တၢ်ပတုၥ်တၢ်ခး လံၥ်ဃံးဃၥ်တဖၣ်, ကတီၢ်ခါ တၢ်ဖံးတၢ်မၤတဖၣ် ဒီး တၢ်တၤတၢ်တဖၣ်န့ၣ်လီၤ.
KIO ခၢၣ်စးတဂၤစ့ၢ်ကီး ဟ့ၣ်ခီဟ့ၣ်နီၤဝဲ ဘၣ်ဃး တၢ်ဖံးတၢ်မၤလၢ ကလုၥ်ဒူၣ်ဖီၣ်စုကဝဲၤကရၢတဖၣ် ဂုၥ်ကျဲးစၢးမၤဝဲ ဒီး အဝဲသ့ၣ် အတၢ်မုၢ်လၢ်ကွၢ်စိလၢ ထံလီၢ်ကီၢ်ပူၤ တၢ်မုၥ်တၢ်ခုၣ် အဖီခိၣ်သ့ၣ်တဖၣ် န့ၣ်လီၤ. အူအူလၣ်စီ စ့ၢ်ကီး ရှဲပၠးဝဲ ထံရူၢ်ကီၢ်သဲးပၣ်တံၣ်တဖၣ် အတၢ်မုၢ်လၢ်ကွၢ်စိလၢ တၢ်မုၥ်တၢ်ခုၣ် တၢ်လဲၤကျဲအဖီခိၣ် ဒီး အဝဲသ့ၣ် အတၢ်ဖံးတၢ်မၤတဖၣ် စ့ၢ်ကီးန့ၣ်လီၤ. ဒ်န့ၣ် အသိး အူစီၤထိဝ့ စ့ၢ်ကီး ပၥ်ဖျါထီၣ်ဝဲ တၢ်မုၢ်လၢ်ကွၢ်စိလၢ တၢ်ဂဲၤလိၥ်လၢ ထံလီၢ်ကီၢ်ပူၤ တၢ်မုၥ်တၢ်ခုၣ် အဖီခိၣ် ဒီး တၢ်ဖံးတၢ်မၤလၢ အဝဲသ့ၣ်တဖၣ် မၤဝဲစ့ၢ်ကီးန့ၣ်လီၤ.
ဒီၣ်ခၠဲၤရံၤဇၤခီ စ့ၢ်ကီး တကီၢ်ခါ တၢ်ဂဲၤလိၥ်လၢ ထံလီၢ်ကီၢ်ပူၤ တၢ်မုၥ်တၢ်ခုၣ် ကတီၢ် တၢ်ကီတၢ်ခဲ, တၢ်တၤတၢ်လၢ တၢ်ဘၣ်ကွၢ်ဆၢမဲၥ်အီၤတဖၣ်, ဒီး တၢ်မုၢ်လၢ်ကွၢ်စိ, တၢ်ဖံးတၢ်မၤလၢ အမၤဝဲတဖၣ် ပၥ်ဖျါရှဲပၠးဝဲဒၣ် ဝံၤအလီၢ်ခံ ခိၣ်နၢ်ခၢၣ်စးတဖၣ် သံကွၢ်သံဒိးတၢ် ဒီး ခိၣ်နၢ်ဘၣ်မူဘၣ်ဒါတဖၣ် စံးဆၢက့ၤ တၢ်သံကွၢ်လၢ ခၢၣ်စးအဲၣ်ဒိးသ့ၣ်ညါဝဲတဖၣ် န့ၣ်လီၤ. တၢ်န့ၣ်ဝံၤအလီၢ်ခံ (Youth Circle) ပှၤနဲၣ်တၢ် စီၤထိထိ ကတိၤစံးဘျူးက့ၤ ခၢၣ်စးတဖၣ်ဝံၤ တၢ်ပျၢ်က့ၤ တၢ်ရဲၣ်တၢ်ကျဲၤအံၤန့ၣ်လီၤ.
Latest Post
တၢ်ဘိးဘၣ်သ့ၣ်ညါ
-
Publishing Karen National Flag App (only for android) for all Karen People
-
နံၤသဘျ့
