Notice

  "From the Karen National Political Dialogue to ward the Political Will of the Karen National"  

  "From the Karen National Political Dialogue to establish a Federal Democratic Union"  

  • English
  • Karen
  • Myanmar

News

News
တနံၤဃီအကတီၢ်ပူၤ သုးမီၤစိရိၤအသုး ကဘီယူၤ ဟဲခးလီၤတၢ်လၢ တၢ်လီၢ် (၄) ဘျီ လၢတၢ်လီၢ် (၃) တီၤ


၂၀၂၂ နံၣ်, လါဒံၣ်စ့ဘၢၣ် (၃) သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) လၢၢ်ဒိၣ်ကီၢ်ဆၣ် ဒီး ဆီထံးကီၢ်ဆၣ် ဟီၣ်ကဝီၤပူၤ ဖဲ ၂၀၂၂ နံၣ် လါဒံၣ်စ့ဘၢၣ်ထီၣ် (၂) သီအနံၤဟါ (၅း၂၀) အဆၢကတီၢ် သုးမီၤစိရိၤ အသုးသ့ၣ်တဖၣ် သူဝဲကဘီယူၤဒုးသုး ဒီး ဟဲခးလီၤတၢ်လၢ ကမျၢၢ်ဖိအိၣ်ဆိးဒူသဝီပူၤန့ၣ်လီၤ. သုးမီၤစိရိၤအသုး ကဘီယူၤ ဟဲခးလီၤတၢ် တၢတတီၤမ့ၢ်ဝဲ ဆီထံးကီၢ်ဆၣ် စီၤသဲခံကရူၢ် ကဟံဒ့သဝီဟီၣ်ကဝီၤပူၤ ခးလီၤဝဲ (၂) ဘျီယ ခးလီၤဝဲကျိဖးဒိၣ် (၄) ဖျၢၣ်, ပိၢ် ၂ ဖျၢၣ် တပိၢ်ဘၣ် (၂) ဖျၢၣ်, ခံတီၤတတီၤမ့ၢ်ဝဲ ဆီထံးကီၢ်ဆၣ်, လၢၢ်ဝါကရူၢ်, လၢၢ်ဝါသဝီဟီၣ်ကဝီၤ ခးလီၤဝဲ တဘျီ (၂) ဖျၢၣ်, ပိၢ်တဖျၢၣ် တပိၢ်ဘၣ်တဖျၢၣ် ဒီး (၃) တီၤတတီၤမ့ၢ်ဝဲ လၢၢ်ဒိၣ်ကီၢ်ဆၣ် ကွံလါကရူၢ် ကွံလါသဝီ ဟီၣ်ကဝီၤ ခးလီၤဝဲတဘျီ (၂) ဖျၢၣ်န့ၣ်လီၤ. သုးမီၤစိ ရိၤအသုး ကဘီယူၤဟဲခးတၢ်ဘျီဝဲအံၤ ကမျၢၢ်တၢ်ဘၣ်ဒိဘၣ်ထံး တအိၣ်ဘၣ် သနၥ်က့ ကမျၢၢ်ဖိသ့ၣ်တဖၣ် ပျံၤတၢ် ဒီးဃ့ၢ်အိၣ်ခူသူၣ်ဝဲလၢ တၢ်ပူၤဖျဲးအလီၢ်န့ၣ်လီၤ.
သုးမီၤစိရိၤအသုး ကဘီယူၤဟဲခး လီၤတၢ်ဝံၤအလီၢ်ခံ မုၢ်နၤခီ (၈း၃၀) နၣ်ရံၣ်အဆၢကတီၢ် သုးမီၤစိရိၤအသုးရ့ၣ် ခမရ (၅၉၈) အသုးတဖၣ် ခးလီၤဝဲကျိဖးဒိၣ်, ကျိဖိ အါအါဂီၢ်ဂီၢ်လၢ ဆီထံးကီၢ်ဆၣ် ကဝီၤ (၃) စလိးကၠံ သဝီအကပိၥ်ကပၤန့ၣ်လီၤ. ဒီး ဖဲ  ၂၀၂၂ နံၣ် လါဒံၣ်စ့ဘၢၣ် (၃) သီအနံၤ ဂီၤခီ (၂း၁၅) နၣ်ရံၣ်အဆၢကတီၢ် ခးလီၤကဒီးဝဲ ကျိဖးဒိၣ်အသီတဘျီကဒီးန့ၣ်လီၤ. သုးမီၤစိရိၤအသုး ခးလီၤကျိဖးဒိၣ်အဃိ ကမျၢၢ်ဖိသ့ၣ်တဖၣ် ပျံၤတၢ် ဒီး ဃ့ၢ်အိၣ်ခူသူၣ်ဝဲလၢ တၢ်ပူၤဖျဲးအလီၢ်န့ၣ်လီၤ.
၂၀၂၂ နံၣ် လါနိၣ်ဝ့ဘၢၣ်ထီၣ် (၁၂) သီအနံၤ လၢၢ်ဒိၣ်ကီၢ်ဆၣ် ဒီး ဆီထံးကီၢ်ဆၣ် ဟီၣ်ကဝီၤပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ထီၣ်ဒုးဖျိးမၤဟးဂီၤကွံၥ်ဝဲ သုးမီၤစိရိၤအသုးကလၢၤ (၃) ဖျၢၣ် ဝံၤအလီၢ်ခံ သုးမီၤစိရိၤအသုးတဖၣ် ဟူးဂဲၤအါထီၣ်ဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး တၢ်ဘၣ်သဂၢၢ်ခးလိၥ်သး ကဲထီၣ်ဝဲခဲအံၤခဲအံၤန့ၣ်လီၤ. သုးမီၤစိရိၤအသုးသ့ၣ်တဖၣ် သူဝဲ Drone ဒီး ဟဲဃုသ့ၣ်ညါတၢ်လီၢ်တၢ်ကျဲ, ဟဲတ့ၢ်လီၤမ့ၣ်ပိၢ်လၢ Drone, ဟဲခးလီၤတၢ်လၢကဘီယူၤ, ခးလီၤကျိဖးဒိၣ်လၢ ကမျၢၢ်ဖိအဒူသဝီ တၢ်ဖံးအီၣ်မၤအီၣ်လီၢ်ကျဲ အိၣ်ဝဲတပယူၥ်ဃီ တုၤခဲအံၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) လၢၢ်ဒိၣ်ကီၢ်ဆၣ်, ဆီထံးကီၢ်ဆၣ် ဒီး မူကီၢ်ဆၣ် ဟီၣ်ကဝီၤပူၤ ကမျၢၢ်ဖိ တကလီၢ်ဘျဲၣ် ဘၣ်အိၣ်မူလၢ တၢ်ပျံၤတၢ်ဖုး တၢ်ဘၣ်ယိၥ်အပူၤ ဒီး ကမျၢၢ်ဖိ (၂၀၀၀၀) ခံကလးဘျဲၣ် ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် အဖၢမုၢ်န့ၣ်လီၤ. ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်သ့ၣ်တဖၣ် လိၣ်ဘၣ်ဝဲ ဂ့ၢ်ဂီၢ်အူ တၢ်ဆီၣ်ထွဲမၤစၢၤ ဒ်အမ့ၢ်ဝဲ တၢ်အီၣ်တၢ်အီ သ့ၣ်တဖၣ်န့ၣ်လီၤ.